Schwiizer* wählet! Kreativieret mir ois!
Naja guet, wenn me wüsse will, was e Schwiizer wählt, muess me zerscht emol wüsse, was e Schwiizer überhaupt isch, odr. Wenn me so Umfroge machet, de ghört me, d Schwiizer sind riich. Schwiizer gliich riich. Also wenn Si nöd riich sind, gälte Si jo praktisch im internationale Vergliich gar ned aus Schwiizer. Oder international, Schwiiz gliich international, das isch au es Argument, wo chummt. Jetzt chönntet Si si froge, wie international sprich wie schwiizerisch bin i eigetlich. D schwiizer Schriftstellerin Sabina Altermatt spricht alli schwiizer Sproche, alli vier ond no meh. Das isch Schwiizerisch, odr. Wenn Si zmindescht zwöi vo dene vier Sproche flüssend chönnti rede, denn würd me Si au no als Schwiizer duregoh loh. Die Melinda Nadj Abonji, die isch Schwiizerin, die het im letzschte Johr sensationell ned numme d Schwiizer, nai, si het au derzue no de Dütschi Buechpriis übercho. D Schwiizerin Frau Nadj Abonji isch im zwoistellige Zahleberiich übersetzt worde. Si het auso aus Schreftstelleri grandioses für aui Schwiizer gleischtet, weltwiit isch das zur Kenntnis gno worde ond es isch äbe au guet, wenn d Schwiiz au nach usse hin guet do stoht, odr. D Wurzle vo dr mit ämene internationale Priis uszeichnete Schwiizerin Frau Nadj Abonji sind ungarisch ond s Serbische chennt si äbe au sehr guet. D Wurzle sind äs internationals Ushängeschild für di ganzi Schwiiz, wo me doch schtolz dörf si, dass es öpper wie die Buechpriisträgerin Nadj Abonji i dr Schwiiz für d Schwiiz git. Ond die Frau Altermatt chennt d Schwiiz sowiso, die het Staatswüsseschafte studiert, näb ire vier Schwiizer Landessproche, wo si redt, auso die Frau Altermatt isch eigetlech die ächti Presidäntin vo dr Schwiiz, auso defür wie gschaffe, die wär authentisch gsi, wörd si zur Wahl stoh. Sandra Bullock redt au flüssend dütsch, die isch au gar ned e richtigi Amerikanerin, die het e dütschi Muetter. Aber das numme am Rand. Z Berlin chönntet si jetzt scho es Schwiizer Dörfli uftue, so vili Schwiizer ziend det änne is grosse B. Schwiizer verlönd i Schare ires Land, d Mieti isch scho sehr tüür do ond z Berlin isches iifach billiger au für d Chind zum Spielsache ichaufe, Jesses nei. Das isch scho klar, die sind alli willkomme, odr. Schwiizer Dörfli hets au z Paris oder z New Glarus. Früecher sind jo ganz vili Schwiizer emol usgwanderet i das Amerika ond das gseht me äbe hüt no a de Näme vo dene Städt det, ond Si händ jo vilicht au Schwiizer Verwandti, wo usgwanderet sind, ond die si bsuechet vilicht ond vilicht sind Si scho es bitzli schtolz uf Ihri usgwandereti Verwandti in Übersee odr egal wo, wo me es günschtigs Reiseziel het, säget Si. Das isch jo ganz normau. Do freut sich doch jedr, odr. D Schwiizer sind domols äbe arm gsi ond s Land het si ned chönne ernähre ond bevor si verhungeret si, si si uf Amerika, odr. Bim 1150-Johr-Umzug händ Langethaler Chind das sehr idrücklech zeiget, das mit em Uswandere vo de Schwiizer. Das isch international bekannt. Schwiizer wandere äbe gärn. Dodra erchennt me d Schwiizer vilecht no am ehndschte: a sine Schue. Dr Schwiizer schiint am kreativschte zi ir Bärgwasserwält. Jo gnau, wältwit öppis tue wägge de Murabgäng, wägge de schwiizer Umweltflüchtleng. Wo gönt d Schwiizer denn äne, wenn ganzi Gägende chönt wägspüelt werde ir Schwiiz, wo d Gletscher zrugg gönd, odr. D Schwiizer wältwit händ do d Wahl:
www.votez.ch; www.smartvote.ch Kreativieret mir ois!
*ond Schwiizerinne!
Melanie S. Rose(c) 2011
msrose - 21. Okt, 13:56
